Dini tələbələrin İmam səhmindən istifadə etməsi
Dini tələbələr İmamın (əleyhis-salam) səhmindən istifadə edə bilərmi?
Onlar faydalı İslam elmlərinin təhsili ilə məşğuldurlarsa, şəri hakimin icazəsi ilə İmam səhmini almalarının eybi yoxdur.
Livat edənin həddi-buluğa çatmasında olan şəkk
Bir şəxs bir oğlan uşağı ilə livat etmişdir. Lakin şəkki var ki, bu əməli edəndə həddi-buluğa çatmışdı, ya yox. O oğlan uşağının bacısı, qızı və ya anası ilə evlənməsi caizdirmi?
Əgər livat işini edənin həddi-buluğa çatmasında şübhə varsa, həmin oğlan uşağının bacısı, anası və ya qızı ona haram olmur.
Öz mərcəyi-təqlidindən qeyrisinə xümsün verilməsi
Hər bir müqəllidin öz malının xümsünü, öz mərcəyi-təqlidinə verməsi lazımdırmı?
Xümsün müqəllidin öz mərcəyinə verilməsi o halda lazımdır ki, digər müctəhidlərin, bu müqəllidin mərcəyinin lazım bildiyi məsrəf olma yerlərində sərf etdikləri məlum olmasın. Habelə mərcəyi-təqlidin hakimin hökmü ünvanı ilə xümsü öz müqəllidlərindən tələb etdiyi surətdə lazımdır. Bu iki haldan başqa, digər müctəhidlərin nəzəri ilə məsrəf etmək olar.
Qonşu ölkələrdə təzə ayın görünməsinin meyarı
Ramazan ayının hilalı (yeni doğan ay) bir şəhərdə görünərsə üfüqləri bir-iki saat fərqli olan digər şəhərlərdə, ayın əvvəli (bu yolla) sübuta yetirmi?
Ayın göründüyü şəhər sözü gedən şəhərlə müqayisədə qərbdə yerləşirsə, ay sübuta yetmir. Şərqdə yerləşirsə, ayın əvvəli sübuta yetir.
Vəqf olunmuş əşyalardan ümumi istifadə
Hüseyniyyənin və məscidin əmlakından istifadə etməyin hökmü nədir?
O məscidin və hüseyniyyənin ehtiyacları xaricində istifadə etmək caiz deyil. Yalnız bu halda caizdir ki, vəqf edən şəxs onlardan istifadənin ümumiliyini aşkar qeyd etmiş olsun.
Müvəqqəti nikahın şəriət hökmü
Müvəqqəti nikahın İslam dini cəhətindən hökmü nədir?
Müvəqqəti nikah fiqhin qəti və inkar olunmaz hökmlərindən biridir. Bu barədə ətraflı məlumat almaq üçün bizim qələm əsərimiz olan “Budur bizim ayinimiz” kitabını, habelə “Təfsiri nümunə” kitabının 3-cü cildində “Nisa” surəsinin 24-cü ayəsinin izahını mütaliə edə bilərsiniz
Qiraətdən sonra "kəzalikəllahu rəbbi" zikri
İkinci rükətdə imam “Tovhid” surəsini oxuyub qurtarandan sonra məmumun "kəzalikəllahu rəbbi" deməsi caizdirmi?
Mütləq zikr (yəni ümumiyyətlə zikr olan bir kəlmə) niyyəti ilə maneəsi yoxdur.
Nazik ehram libası geymək
Qadınların ehram paltarı bədənləri görsənəcək qədər nazik olsa, onların həcc əməllərinə zərər yetirə bilərmi?
Bu iş haramdır. Lakin təvafdan və təvaf namazından digər yerlərdə olsa, həcc batil olmur.
Vəqf və ya mülkiyyətə keçirərkən hədiyyə verənin niyyəti
Onların (məscidə) vəqf olunduğunu, yoxsa mülkiyyətə keçirildiyini ayırd etmək üçün, hər birini xüsusi bir söz və ya cümlə ilə dilə gətirmək lazımdırmı? Yoxsa hədiyyə edənin niyyəti təklikdə kifayətdir?
Niyyət kifayətdir və əməllə muatat xarakterli olacaqdır.
Namazdan sonra əl verib görüşmək
Bəzi tələbələrin fikrincə, namazdan sonra əl verib görüşməyin hökmü hədislərdə gəlmədiyinə görə, bu iş bidətdir və onu tərk etmək lazımdır. Digər tərəfdən də, namazdan sonra əl verib görüşmək tərk olunarsa camaat namazının xas hədəfləri layiqincə icra olunmayacaqdır. Bunları nəzərə almaqla xahiş edirik ki, namazdan sonra əl verib görüşməyin hökmünü bəyan edəsiniz.
Bidət odur ki, dində olmayan bir şeyi dinin bir hissəsi adı ilə yerinə yetirsinlər və ya əməldə belə bir fikri bəyan etmiş olsunlar. Buna əsasən əl verib görüşməyi mütləq mətlub olan (namazdan da qeyri hallarda, ümumi şəkildə istənilən) əməl məqsədilə yerinə yetirsələr və bəzən də bunu tərk etsələr, heç bir işkal (problem) yaranmayacaqdır.
Qara libasla qılınan namaz
Namazda qara paltarın məkruhluğu bacıların qara çadrasına, habelə qara əbaya şamil olurmu?
Qara paltarın namazda məkruhluğu məşhurdur. Bunun üçün istinad edilən dəlil həm qadın, həm də kişilərə aiddir. Lakin əba bu hökmdən istisna olunmuşdur. Qadınların çadrasının da bu hökmdən istisna olmasını ehtimal vermək olar.
Toy məclislərində rəqs
Toy məclislərində rəqs etmək caizdirmi?
Rəqs etmək fəsad mənşəyidir və işkalı var. İstər qadının qadın üçün, istər kişinin kişi üçün, istərsə də qadınların kişilər üçün rəqsi olsun. Lakin qadının öz əri üçün rəqs etməsinin eybi yoxdur.
Təvaf edənlərin dairəsindən kənarda təvaf
Həcc mövsümündə Məscidul-həramın işçiləri qoca və xəstə adamları sərirlə (taxt, xərək) başları üzərində təvaf etdirirlər. Adətən, onlar təvaf edənlərin dairəsindən kənarda hərəkət edirlər. Bunların həcci səhihdirmi?
Onların təvafının eybi yoxdur. Buna görə ki, təvafda məşhur hüdudlara riayət etmək (məsafəni saxlamaq) vacib deyil, ehtiyat müstəhəbdir və sıralara da qoşulmaq (izdihama birləşmək) şərt deyil.
