Zövcəyə hədiyyə
Arvada verilən hədiyyə “lazım” (geri qaytarılması caiz olmayan) hədiyyədirmi?
Arvada verilən hədiyyə “lazım” hədiyyə deyil, lakin onu geri almaq məkruhdur.
Hədiyyənin gəlirinin hədiyyə edənə verilməsi
Bir şəxs öz mülk və torpaq sahəsini başqa birisinə hədiyyə verib deyir: “Nə qədər ki, mən sağam onun ixtiyarı öz əlimdə olmalıdır”. Bu hədiyyə mötəbərdirmi, bu şərt “lazım”dırmı (yəni, onun pozmaq olmazmı)?
Əgər mülkü və torpaq sahəsini onun ixtiyarına versə, eybi yoxdur, bu halda qüvvədədir və “lazım” hədiyyə sayılır. Nə qədər ki, torpaq sahibi sağdır, torpağın xeyir-mənfəəti onunkudur.
Əvəzli hədiyyələri pozmaq ixtiyarı
Bir şəxs öz torpaq sahəsini başqa birisinə əvəzində bir şey vermək şərti ilə hədiyyə verir, lakin hədiyyə verilən şəxs hədiyyə edən adamın vəfatına qədər onun əvəzini ödəmir. Hədiyyə verənin varisinin, irs qalmış hədiyyəni pozmaq ixtiyarı varmı?
Bəli, pozmaq (qüvvədən salmaq) ixtiyarı vardır.
Qaib olan övlada hədiyyə
Bir kəs öz daşınan əmlakının bir hissəsini şəxsən orada olmayan oğluna hədiyyə verir və oğlunun əvəzindən onu təhvil almaq üçün bir vəkil tutur. Vəkildə əmlakı təhvil alır. Bu hibə (hədiyyə) mötəbərdirmi? Çünki, hədiyyə edən şəxs övladı qayıtmamışdan öncə dünyadan getmişdir. (Qeyd etmək lazımdır ki, bu vəkalət şəri hakimin icazəsi ilə olmuşdur.)
Əgər orada olmayan (qaib) övlad həddi-buluğa çatmışdırsa, sözü gedən vəkalətin faydası (etibarı) yoxdur. Həddi-buluğa çatmamışsa, (atanın hədiyyə etməsi təklikdə) kifayətdir və vəkilə ehtiyac yoxdur.
Hədiyyəni geri almaq
Əgər bir şəxs digərinə Quran hədiyyə etsə, onu geri ala bilərmi?
Əgər qürbət qəsdi ilə (Allaha yaxınlaşmaqdan ötrü) olmuşdursa, (geri almaq) işkallıdır.
