میت کے ترکہ میں اپنے حصّہ سے زیادہ میں تصرف کرنا
کیا حقیقی وارثوں کو، اپنے حق سے زیادہ میراث میں تصرف کرنے کا حق ہے؟
جواب: کسی وارث کو حق نہیں ہے کہ اپنے حصہ سے زیادہ وصول کرے، مگر یہ کہ باقی سب راضی ہوں ۔
میت کی نماز و روزہ بجالانے کیلئے میت کے ترکہ سے کسی شخص کو( اجرت پر حاصل کرنا) اجیر بنانا
احتیاطاً مرحوم کے قضا روزے نماز ادا کرانے کے لئے کیا وارثوں کو میت کے ترکہ میں سے کسی شخص کو اجیر بنانے کا حق ہے؟
جواب: فقط بالغ وارثوں کو اپنے حصہ میں سے، کسی کو اجیر بنانے کا حق ہے ۔
دِیت کے وارث
میراث میں، دیت کی رقم کس کو ملے گی؟
جواب: نَسَبی ا ور سَبَبی تمام وارثوں کو ملے گی مگر یہ کہ ماں کی اولاد ہو (جیسے ماں کی جانب سے بھائی بہن)۔
میراث کے حصّہ کو ہبہ کرنے کا دعویٰ
جب بہن بھائی دونوں، اپنے والد کے وارث ہوں اور میراث کا مال بھائی کے اختیار میں رہے یہاں تک کہ بہن بھائی دونوں کا انتقال ہوجائے، اس کے بعد بہن کے وارث کہیں کہ ہمارا حصہ دو لیکن بھائی کے وارث جواب دیں کہ بہن نے اپنا حصہ بھائی کو ہبہ یا فروخت کردیا تھا، اس سلسلہ میں وظیفہ کیا ہے؟
جواب: اگر رشتہ دار، جان پہچان والوں اور جانکاروں سے پوچھ تاچھ اور دریافت کرنے کے بعد بھی مسئلہ واضح نہیں ہوا تو اس صورت میں احتیاط یہ ہے کہ دونوں کے وارث آپس میں مصالحت کریں البتہ اگر وارثوں میں، نابالغ بچہ نہ ہو ورنہ احتیاط یہ ہے کہ نابالغ بچہ کے حق کی رعایت کی جائے ۔
میت کی میراث کے مال میں دوسری بیوی کا حصّہ
میرا نام فاطمہ ہے، میرے شوہر کا سن ٦٣ھ شمسی میں انتقال ہوگیا تھا، ملحوظ رہے کہ میں ان مرحوم کی دوسری بیوی ہوں، ان کے انتقال کے دو سال بعد ان کے بچوں نے ان کا مال میراث کے طور پر تقسیم کرلیا جبکہ مجھے میرا حق بالکل نہیں دیا گیا، اُن مرحوم کی دولت وثروت اور زمین جائداد درج ذیل شرح کے مطابق ہے:١۔ پستہ کے باغات، ٢۔تین رہائشی مکان جو اُن مرحوم کے نام ہیں ٣۔ٹریکٹر اور اس کا سازوسامان ٤۔کنواں، ٹیوب ویل اور اس کی عمارت، پانی بجلی کا کنکشن اور کنویں بنانے کے لئے حکومت سے اجازت نامہ ٥۔منقولہ مال اور گھر کی ضروریات کا سامان، مذکورہ مطالب کو ملحوظ رکھتے ہوئے برائے مہربانی درج ذیل سوالوں کے جواب عنایت فرمائیں:الف) کیا مجھے ان چیزوں میں کوئی حق ہے اور اگر ہے تو اس کی کیا صورت ہے؟ب) یہ بات مدنظر رکھتے ہوئے کہ اس ١٣سال کی مدت میں مجھے میرا حق نہیں دیا گیا ہے کیا ان چند سال کی آمدنی میں بھی میرا حصہ ہے؟ج) کیا ان چیزوں کی میراث دینے کے لئے، ان کی دور حاضر کی قیمت معیار ہے، یا میت کے انتقال کے وقت کی قیمت اور اگر میت کے انتقال کے وقت کی قیمت معیار ہے تو کیا مہنگائی وغیرہ کا اس میں حساب ہوگا؟
جواب:الف) غیر منقولہ چیزوں (جیسے باغات وغیرہ) کا آٹھواں حصّہ اور اسی طرح منقولہ چیزوں کا آٹھواں حصّہ دونوں بیویوں کو ملے گا، جو برابر دونوں میں تقسیم کیا جائے گا ۔ب) منقولہ مال کی آمدنی میں سے ، مذکورہ مدّت کے منافعہ کو ادا کریں اور احتیاط یہ ہے کہ غیر منقولہ چیزوں کے بارے میں بھی ایسا ہی کریں (یعنی مذکورہ مدت کا منافعہ ادا کریں)ج) ادا کرتے وقت کی قیمت معیار ہے ۔
مقتول شوہر کی دیت میں زوجہ کی میراث
کیا اس رقم میں جو شوہر کی دیت کے عنوان سے دریافت ہوئی ہو، زوجہ کا بھی حق ہے؟
جواب: جی ہاں، دوسرے تمام مال کی طرح اس میں سے بھی زوجہ کو میراث ملے گی ۔
عقد نکاح کے وقت ایک کو میراث ہبہ کرنے کی شرط لگانا
کیا شادی کرتے وقت، نکاح کے ضمن میں شوہر اپنی زوجہ سے شرط کرسکتا ہے کہ اگر وہ پہلے مرگیا اور زوجہ اس وارث ہوگئی، تو وہ اپنی میراث کو اس کے بیٹے کو ہبہ کردے جو اس شخص کی پہلی زوجہ سے ہے جس کا انتقال ہوگیا تھا؟
جواب: یہ بات ملحوظ رکھتے ہوئے کہ یہ شرط، کاملاً مبہم اور غیر واضح ہے، اشکال سے خالی نہیں ہے ۔
زوجہ کے مہر میں سے، شوہر کا میراث پانا
کیا زوجہ کا مہر بھی اس کی میراث کا حصہ ہے اور اگر میراث کا حصہ ہے تو کیا شوہر کو حق ہے کہ مہر میں سے اپنا حصہ نکال کر باقی رقم کو، زوجہ کے دیگر وارثوں کو دیدے؟
جواب: جی ہاں، اس کی میراث کا حصہ ہے اور اس کے دیگر تمام مال کی طرح تقسیم کیا جائے گا ۔
آبیاری کی نالیوں اور کنویں کے پانی کی میراث سے بیوی کا حصّہ
کیا زوجہ کو، آبیاری کے لئے قدرتی حوض اور نالیاں یا کنویں کے پانی میں سے میراث ملے گی؟
جواب: فقط اس مقدار پانی سے جو شوہر کے انتقال کے وقت، اس میں موجود تھا، میراث ملے گی ۔
اگر مرد کے بچّے نہ ہوں تو اسکی میراث میں بیوی کا حصّہ
زید کی پہلی زوجہ کا وضع حمل کے وقت انتقال ہوگیا، اس کے کچھ دیر کے بعد اس کا نومولود بچہ بھی مرگیا، اس واقعہ کے ایک سال بعد اس نے اپنے خاندان ہی کی ایک لڑکی سے دوسری شادی کی اور بیس سال ازدواجی زندگی بسر کی لیکن دوسری زوجہ سے کوئی اولاد نہیں ہوئی، یہاں تک کہ اب اس کا انتقال ہوگیا ہے، اس صورت میں اس کی بیوہ کی میراث کی کیفیت کیا ہے؟
جواب: جب انتقال کے وقت ، شوہر کے کوئی اولاد نہ ہو تو اس کے مال کا ایک چوتھائی حصہ میراث کے طور پر اس کی بیوہ کو ملے گا (زمین کے علاوہ) اور باقی مال ودولت دوسرے وارثوں کا حق ہے ۔
اگر وارث فقط بیوی ہو
اگر شوہر اور زوجہ کا ایک دوسرے کے علاوہ، کوئی اور وارث نہ ہو تو اس صورت میں اُن کی میراث کیسے تقسیم کی جائے گی مہربانی فرماکر بیان فرمائیں؟
جواب: جب کوئی شوہر یا زوجہ دنیا سے گذر جائیں اور کوئی دوسرا شخص ان کا وارث نہ ہو، اس صورت میں اگر زوجہ کا انتقال ہوجائے تو اس کا تمام مال، شوہر کا حق ہے اور اگر شوہر کا انتقال ہوجائے تو اس کا ایک چوتھائی مال، زوجہ کا حق ہے اور باقی مال امام علیہ السلام سے متعلق ہے ۔(١)١ جواہر، ج،٣٩؛ وسائل الشیعہ، ج١٧، باب میراث الزواج
حکومت کی رقم سے شہید کی زوجہ کی میراث کا حصّہ (سہم)
ایک شخص اپنا ٹرک لیکر، میدان جنگ یعنی محاذ پر جاتا ہے اور وہاں پر خود شہید اور ٹرک منہدم اور بر باد ہوجاتا ہے، اس کے بعد حکومت ٹرک کا معاوضہ، اس کے گھرواوں کو دیدیتی ہے کیا شہید کی زوجہ (بیوہ) مذکورہ رقم میں سے، میراث کے طور پر اپنے حق کا مطالبہ کرسکتی ہے؟
جواب: اگر محاذ پر ٹرک کو لیجانا، حکومت کے کہنے سے تھایا حکومت نے ضمانت لی تھی (اگرچہ عام طور پر حکومت نے ضمانت لی ہو نہ فقط اس مورد میں) تو اس صورت میں شہید کی زوجہ کو اس رقم کا آٹھواں حصہ میراث کے طور پر ملے گا اور اگر مذکورہ شہید، حکومت کے کہے بغیر یا اس کی ضمانت کے بغیر اپنی مرضی سے محاذ پر ٹرک لے گیا تھا تب مربوط افسروں سے دریافت کرنا ضروری ہے کہ ٹرک کا معاضہ دینے سے ان کا کیا مقصد ہے شہید کے بچوں کی مدد کرنا ہے یا اس کی زوجہ بھی شامل ہے نیز دریافت کرنا ضروری ہے کہ عطاء کی ہوئی یہ رقم، اس کی میراث کا حصہ ہے یا اس سے کم یا زیادہ ہے؟
