دو جگہوں پر جماعت سے نماز پڑھنا
کیا دو جگہ پر نما ز عیدین کی جماعت کرائی جا سکتی ہے ؟
جواب:۔ ایسا کرنے میں اشکال ہے لیکن نماز پنجگانہ میں دو جگہ دو مختلف گروہوں کے ساتھ جماعت کرائی جاسکتی ہے ۔
نافلہ کی نیت سے مستحب نماز پڑھنا
وہ مستحبی نمازیں کہ جنہیں کی اداکرنے کی مخصوص کیفیت ہے جیسے نماز وحشت ، کیا ایسی نماز کو ، روزانہ کی نافلہ نمازوں میں شمار کیا جاسکتا ہے؟
جواب : اگر اس نمازکو پڑھتے وقت، نافلہ کا قصد کیا ہے ، تو نافلہ میں شمار ہوگا اور امید ہے کہ مخصوص نماز کا ثواب بھی ملے گا۔
کفر اور مرتد ہونے کا الزام و تہمت
جو شخص، دوسرے پر کفر والحاد کی تہمت لگاتا ہے اور حاکم شرع کے سامنے اس الزام کو ثابت نہیں کرسکتا ہے اس کا کیا حکم ہے؟الف) کیا اس طرح کے مورد کو قذف کا مصداق سمجھا جاسکتا ہے؟ب) جواب کے منفی ہونے کی صورت میں، اس کے ساتھ کس طرح کا برتاؤ کرنا چاہیے؟ج) چنانچہ وہ شخص، جس پر تہمت لگائی گئی ہے، اپنے حق سے صرف نظر اور درگذر کرے تو کیا اس طرح کا الزام لگانے والے شخص سے، سزا (حد) یا تعزیر ساقط ہوجائے گی؟
الف و ب) قذف فقط دو صورت میں ہوتا ہے: زنا کی تہمت لگانا یا لواط کا الزام لگانا، باقی دوسرے ناجائز الزامات لگانے پر تعزیر (غیر معین سزا) ہے ۔جواب: ج) ظاہر یہی ہے کہ حقدار کے اپنے حق سے درگذر کرنے سے، تعزیر کا حکم جاری نہیں ہوگا، مگر یہ کہ حاکم شرع تشخیص دے کہ اس طرح کے موارد میں، تعزیر ی سزا کو ترک کرنا، معاشرے میں گناہ وفساد کا سبب بنے گا، تب عنوان ثانوی کے اعتبار سے اس کو تعزیر کیا جائے گا ۔
جنگی زخمیوں کے متعلق نرسوں کا محرم ہونا
بندہ ناچیز، انقلاب اسلامی ایران کا ایک جنگی زخمی ہوں میری گردن سے نیچے کا حصّہ مفلوج ہے اور کسی صورت سے بھی اپنے کام انجام دینے پر قادر نہیں ہوں اور چونکہ ایک خاتون، محض خوشنودی خدا کیلئے، جنسی مسائل کے علاوہ میرے تمام کام انجام دیتی ہے، تو کیا ہمارے محرم ہونے کا کوئی راستہ ہے ؟
جواب:۔ اگر اس کا عقد متعہ (اگر چہ بہت ہی کم مدّت کیلئے ہو) آپکے والد سے پڑھ دیا جائے تو ہمیشہ کیلئے وہ آپ کیلئے مِحرم ہوجائے گی البتہ اس کا مِحرم ہونا، ماں اور بہن کی طرح محرم ہونا ہے، بیوی کی طرح نہیں .
ہمسر کی توہین کرنا
زوجہ کا شوہر کی توہین اور شوہر کا زوجہ کی توہین کرنے کا کیا حکم ہے ؟
جواب:۔کسی کو بھی دوسرے کی توہین کرنے کا حق نہیں ہے یہاں تک شوہر و زوجہ کو بھی نہیں .
ماں کے مہم آپریشن کے لیے حمل کا سقط کرنا
ایک خاتون جو آنکھ کی بیماری میں مبتلا ہے، ماہر ڈاکٹروں کے مطابق اسے جلد سے جلد آپریشن کرانا چاہیے، مگر اس کے پیٹ میں تین ماہ کا حمل ہے جس کا سقط کرانا آپریشن کے لیے ضروری ہے ورنہ وہ ہمیشہ کے لیے اندھی ہو جائے گی اور اسی طرح سے سقط نہ ہونے کی صورت میں حمل کو بھی نہایت ضرر ہو سکتا ہے تو کیا ایسی حالت میں سقط کرانا جائز ہے؟
جواب: مسئلہ کی نزاکت کو دیکھتے ہوئے ظاہرا سقط کرانے میں کو ئی حرج نہیں ہے ۔
مشترکہ جائداد کا کرایہ
کیا ایسے مکان کے مشترکہ مالکان، کہ جس کی دو منزلیں ہیں اور ہر منزل مستقل ہے اور دو منزلہ مکان کی ایک منزل ایک حصّہ دار کے تصرّف میں ہے، اپنے حصّہ کا مکان (جس میں وہ نہیں رہتے) کسی دوسرے کو کرایہ پر دے سکتے ہیں؟ نیز اگر کوئی ایک حصّہ دار دوسرے کے حصّہ کا مکان کرایہ پردینے سے منع کرے تو اس کا نقصان کس کے ذمہ ہوگا؟
دونوں حصّہ دار اپنا اپنا حصّہ دوسرے شخص کو کرایہ پر دے سکتے ہیں اور دوسرا حصّہ دار منع کرنے کا حق نہیں رکھتا، وگرنہ ضامن ہے مگر یہ کہ دوسرے حصہ دار کے لئے نقصان کا باعث ہو ۔
ولایت کا حق داماد کی جانب منتقل ہوجانا
کیا باپ بیٹی کے اوپر اپنی ولایت (سرپرستی) کے حق کو، کچھ رقم کے بدلے داماد کو دے سکتا ہے ؟
جواب:۔باپ کی ولایت کا حق دوسرے کو دینے کے قابل نہیں ہوتا، نہ رقم کے بدلے اور نہ بغیر رقم کے .
قید میں گزارے دنوں کو تعذیر یا تازیانوں کی جگہ حساب کرنا
چنانچہ تعذیرات کی وجہ سے قانونی دلائل کی بنیاد پر مجرم کو کچھ روز حوالات میں روکا جائے، کیا اس کے تازیانہ کی سزا میں تخفیف کے قائل ہوسکتے ہیں ؟ مثلا ایک شخص نے غیر شرعی رابطہ پر زنا کی حدود تک اقدام کیا تو اس پر ۹۹ کوڑے لگائے جائیں لیکن چونکہ ۱۰ روز ، صدور حکم کے زمانہ تک قید میں رہا، کیا اس کی سزا میں سے ۵۰ یا اس سے کم یا زیادہ تازیانے کم کیے جاسکتے ہیں؟
جواب : تعذیر کی کیفیت اور اس کی مقدار قاضی کے اختیار میں ہے، یہاں تک کہ مصلحت کی صورت میں اس کے قید کے دنوں کو پوری تعذیر کی جگہ شمار کرسکتا ہے۔
ایسے والدین کی نگہداشت جن کے یہاں بیٹا نہیں ہوتا
کیا ایسے ماں باپ کی خدمت کرنے کی ذمّہ داری کہ جن کے بیٹا نہیں ہے ، ان کی بیٹیوں کے اوپر ہے ؟
جواب:۔ جی ہاں ان کی بیٹیوں کے اوپر ہے جس قدر وہ قدرت رکھتی ہیں .
والدین کی خدمت کےلئے نرس لگانا
کیا ضرورت کی صورت میں باپ کی دیکھ بھال کرنا اولاد کے اوپر لازم ہے ؟
جواب:۔ احتیاط واجب یہ ہے کہ ان کی دیکھ بھال کے اخراجات ادا کریں، یا پھر بذات خود ان کی دیکھ بھال کریں .
بیٹے اور بیٹیوں کے درمیان میراث کو برابر تقسیم کرنے کی وصیت
دوسال پہلے میری والدہ محترمہ کا انتقال ہوگیا تھا، جبکہ ان کی اولاد میں سے ہم چار بھائی اور تین بہنیں ہیں، مرحومہ کی میراث میں ایک جگہ ہے جس کی قیمت تقریباً ایک کروڑ تومان ہے ، ہم لوگوں کا ارادہ تھا کہ اس کو فروخت کرکے، سب بہن بھائی اپنا اپنا حصہ لے لیں، لیکن ہماری بہنیں مرحومہ والدہ کی اس مضمون کی تحریر پیش کرتی ہیں کہ میراث تقسیم کرتے وقت میرے بچے، بیٹی اور بیٹے کے حصہ میں کوئی فرق نہ رکھیں اور سب برابر طور پر حصہ وصول کریں ، اب جبکہ ہم سب اپنی ماں کی تحریر کے صحیح ہونے یعنی یہ کہ وہ تحریر ہماری والدہ کی ہے، یقین رکھتے ہیں، لیکن ممکن ہے کہ ہمارے بعض بھائی تہہ دل سے اس بات پر راضی نہ ہوں لہٰذا آپ فرمائیں کہ ہمارا شرعی وظیفہ کیا ہے؟
جواب: اس بات پر توجہ رکھتے ہوئے کہ ماں کو اپنے مال کے ایک تہائی حصہ میں تصرف کرنے کا حق حاصل تھا، لہٰذا جو کچھ انھوں نے تمھاری بہنوں کے حصّوں کے بارے میں لکھا ہے، اس میں کوئی اشکال نہیں ہے، اس لئے کہ مذکورہ فرق ایک تہائی حصّہ سے کم ہے، لہٰذا اس بناپر ماں کی وصیت کے مطابق عمل کریں ۔
دو جنس رکھنے والے افراد کا جنس تغییر کرانا
ایک لڑکی بچپن سے لڑکوں کا لباس پہنتی تھی اب جبکہ وہ بڑی ہو گئی ہے خود کو لڑکا سمجھتی ہے اور کچھ دواوں کے استعمال سے اس میں مردانہ حالتیں پیدا ہو گئی ہیں اور اس نے ڈاکٹر کے پاس جا کر اپنی جنس بدلنے کی خواہش ظاہر کی ہے، کیا ڈاکٹر کے لیے ایسا کرنا جائز ہے؟
جواب: جنسیت کا تغییر دینا اگر صوری اور ظاہری ہو تو جائز نہیں ہے لیکن اگر واقعی ہو (جیسا کہ عام طور پر بعض افراد میں دو جنس پائی جاتی ہے) تو وہاں پر علاج اور واقعی جنسیت کو ظاہر کرنے کے لیے کبھی ایسا کرنا جائز اور کبھی واجب ہے ۔
بچوں اور شیرخواروں کا طواف
اگر طواف یا سعی کے دوران چھوٹے بچے سوجائیں یا طواف کے دوران نوزاد بچہ اپنے کپڑوں میں پیشاب کرلے تو اس کا کیاحکم ہے ؟
جواب :۔ دونوں صورتوں میں صحیح ہے انشاء اللہ ۔
